Vangela ubuye Ufundise
Ukuvangelwa kumoni nokufundiswa kwakhe ngoThixo zizinto ezimbini ezohlukeneyo noxa umsebenzi wazo umnye ikukulungiswa kwalo moni elungiselelwa iZulu. Ukumvangela kukumohlutha kwingalo zongendawo umzise phambi koThixo. Ukufundiswa kwakhe kona kukuhlala phantsi umazise ngentando yalo Thixo athi ngoku umamkele.
Le nto inqwa nomlobi wentlanzi ophosa umnatha elwandle, suka eze nayo yonke into ayirugule kuloo manzi ngalo mnatha. Balapho oononkala, nenye intaphane yezilwanyana zase manzini angazikuyenza nto yena. Uthi akuwukhupha lo mnatha kulo manzi kufuneke ngoku ahlale phantsi akhethe intlanzi zokwenene kulo mgquba angazi kwenza nto ngawo.
Nomshumayeli ke wenjenjalo eqhuqha amakhalane kule miphefumlo eze nayo eyifundisa ukuba uThixo ufuna ukuba iphile njani na xa izibiza ngaye. Le Mfundiso itsho bazinze apha enkolweni. Kaloku ilizwe eli bakhutshwa kulo alibayekanga, lisabakhweba. Wena ke njengamshumayeli uyabaxhobisa ubathwes’amacebo ukuba bathinina ukuzihlanganisela kwizagwevu zotshaba.
Ngaphezu koko kusafuneka nabo aba bezuze abanye abakwakule mida yotshaba. Enye yeendlela ke neyona inamandla kukushumayela kweli hlabathi baphuma kulo ngezimilo ezizalwa kukufundiswa kwabo. “UBawo uzukiswa ngale nto yokuba nithwale iziqhamo.” NguYesu ngokwakhe lo utshoyo.
Yonke ke le Mfundiso iphuma eBayibhileni eli lizwi likaThixo eliphilileyo lisebenza libukhali ngaphezu kwamakrele onke antlangothi mbini; lihlaba liphumele lide lahlule umphefumlo kwanomoya amalungu, kwanomongo; linokugweba iingcingane nezicamango zentliziyo. Masikhuthale ukuze nale miphefumlo phambi koThixo, kodwa singakuhilizeli ikuyifundisa.
Dr OT Mngqibisa
Good morning mfundisi ndiyabulela nditso ndakhuthazeka emoyeni
Ndiyabulela Dr ngemfundiso ekhuthazayo nekhulisa ingqondo yomntu,ukuze kuvele isiqhamo kwimbewu oyihlwayeleyo kumele ukhumbule uxanduva lokuyincenceshela maxa onke.
Doc.
Ndibulela kakhulu ngezimfundiso
Kungathi kusuke inku gu emehlweni am ndiyakhanyiseleka…enkosi Doc
Enkosi ngemfundiso Dr ziyasakha
Tata ndinombulelo kakhulu kuwe ngo hlala usifundisa njenge nkokheli zakusasa ezisafunda ukushumayela. Thixo makakugcine. Enkosi